الحزن دايم الحزن

مشتاگة .. بگد وحشة البيت
مشتاگة .. و بشوگي ضليت
أسأل دموع عيوني .. ما ردو العافوني مشتاگة
____
يا شوگي يا چتالي .. ارحم جرح دلالي
وگلي شلونهم زينين .. هلي الما ادري بيهم وين
ما ضلي واحد غالي .. لو اموت والله اشوالي
وخيعون الفگدله اعزاز .. و رافگ مشية الجناز
شمسويه و ابقى لوحدي مگطوعة چن من شجرة
لا ضلي عم ولا ابو و راحن بنات الزهرة
بعيوني .. ما ضلت دموع
بعيوني .. طفوها الشموع
و ما حسبت يجفوني .. ما ردو العافوني مشتاگة
____
الفارگ أحبابه بزغره .. باقي المن ليا حسرة
وجع شوغاتي تالي الليل .. وين الگالهن تأويل
شرد انسه من العِشرة .. و بكلشي اصادف ذكرة
اغمض عيوني الگه حسين .. و ارد افتحهن الگه حسين
الگاهم شما ألتفت بعيون گلبي و روحي
اغفه اعله طاريهم صرت و اصحه بونين جروحي
يا روحي .. چا وين الأحباب
يا روحي .. جرحج و لا طاب
معقولة چا ينسوني .. ما ردو العافوني مشتاگة
___
محتارة اي محتارة .. و گلبي التسولف ناره
وين بيا مكان شلون .. گعدو هسه لو يمشون
عبد الله شنهي اخباره .. الما عفته من اصياره
ليش من ايدي تالي يروح .. و يخليلي بس النوح
عبد الله چان بنومته ما نحچي خاف انگعده
و عن لا يفز من العطش انخلي ماي ابمهده
چا وينه .. ما يرجع الراح
چا وينه .. ما ظنه مرتاح
و كل ماله يبهت لوني .. ما ردو العافوني مشتاگة
_
ساعة الطم و ساعة انعي .. و أسأل عليهم دمعي
و خدي يترجم الدمعات .. لو نزلن على الوجنات
أرفع چفوفي و ادعي .. بس الله يدري بوضعي
دمعات الهجر و الشوگ .. تلچم گلبي المحروگ
اشهگ و اموت بحسرتي كل ليلة بس ما احچي
صار الي يسمع نبرتي يحتار و يضل يبچي
مجروحة .. و مبحوحة الصوت
مجروحة .. و الدنيا تابوت
لو اموت يا خيعوني .. ما ردو العافوني مشتاگة
_
مشتاگة نلتم لمه .. و كلمن يسولف همه
واگلهم همي كله افراگ .. يموت بسكتته اليشتاگ
يحچي الجرح كل لچمة .. و دمع الهضم شيضمه
تمنيت و يجيني الليل .. و تدوس اعله امنياتي الخيل
كل أمنياتي اشتم عطر بي نسمة التفاحة
و حسيني اشوفنه فرج للصبر و لمفتاحه
أمنيتي .. احبابي يلفون
أمنيتي .. و تهيد العيون
بس لا تخيب اضنوني .. ما ردو العافوني مشتاگة
__
عباس حسن السوداني

ما ردو العافوني

كلشي يموت   من تغمض عيونك
عالتربان   مطروح ايخلونك
تلث تيام بلا تجفين    يوم امصابك مثل حسين
يالجواد    يالجواد
*
ما دريت ايطول نوحي    وجرحك ايخضر مصايب
هنه كلهن يوجعني    وعالزمن ماريد اعاتب
هذا حال الدنيه بعدك    ينسي الماله حبايب
عالسطح مطروح جسمك    مثل جدك عالترايب

يومك صار   يشبه يوم العاشر
اليفرق جان    ما مسحوك بحافر
بدلالك تسعر نارين    يوم امصابك مثل حسين
***
يالجواد عيوني تدمع    وكلبي ما يبرد لهيبه
حسين كطعو راسه بالطف    وبين العباس شيبه
جدك المرضوض صدره   جثته ضلت غريبه
تدري جسم حسين عاري    وشيبته بالدم خضيبه

ليش الخيل    ماخذته وجايبته
بصعب حال    وكلبه ايحن اعله اخته
ضل الزينب يربي العين   يوم امصابك مثل حسين
****




ها يكلبي اشلون تصبر    والاودهم فاركوني
حيرت اليفكد جبيره   وانه كلهم ودعوني
من يجيني الليل اكعد   ابجي دم عالما يجوني
المهدي انه وراسي شيب   والحبايب  شو جفوني

انته وياي   عايش تدري امصابك
كل ما زور   اوكف وبجي ابابك
كلها الغايب تسال وين   يوم امصابك مثل حسين
*
انته يمك ناس حضرت   عالاقل كلبك تجبره
حسين مامش ناس عنده   وذبحو اوليده اعله صدره
والشمر لازم لحيته    وحيل عالهامه يطبره
امن السحك والخيل تدري    والله راح حسين ضهره

لمن طاح   بحجار ايرامونه
ومن الماي   جا ليش ايحرمونه
عن المصرع ابدي امنين   يوم امصابك مثل حسين
***









الليله مكسوره الخواطر   ورادت امتون الجنازه
عالدرب مطروح نعشك   وعازت الخوان عازه
يالجواد الهادي ناده   وعالجفن دمعه توازه
والجرح لو راح غالي   بالكلب يشغل حيازه

يالمسموم   ناح الهادي الفكدك
ومن شالك   ون وتذكر جدك
والهادي اتعذب مرتين   يوم امصابك مثل حسين
*
ناحت الاملاك كلها   والسمه وحشه شفتها
والكواكب تنعه لجلك    والمساجد يتمتها
واليتامه والارامل    تنحب ابابك عفتها
من رحت يابو المحنه    اوياك جم روح الخذتها

ملك الموت   حار بقبضة روحك
والكل صاح   ما تنعد اجروحك
حزنك بيه وعشته اسنين   يوم امصابك مثل حسين
****
تمت
تحسين الخفاجي

كلشي يموت

ابتعب روحي جبت ضعني
وجـبـت الكلـشـي يـوجعني
مـن زيـنــب لـحــد العمره بس شبگه

يوادم كمت اشوف اهواي
من هسـه وجـرعني الماي
والـ محـملهه فـوك الـنـاگه مـحـتركه{خيمه}

اصد الـمن واهـل بيـتي بـعـد ايـام
اطيح انه ويفـزعـهـن حـريج اخيام
احير ابروحي بس روحي وعلي زينب
تركـض مـن ابـاوعـهه وجبيرت عام

اگعد وعاين  === حرگت جروحي
تركض بناتي ===يا تـالـي روحـي == عذاب
ياهوو الاشبگه === ايحيرني ضيمه
بــاجـر يـوادم === تـكـتلنـي خيمه == وتراب
===========================

اعله ليل الله تنام العين
واظل انه ابـ حزن مو زين
ياهــوه الابــاوعـلـه انـذبــح مـنـي

شـمـا رت اشـبـگ الاكبر
يـوگـف گلـبـي مـا اگـدر
يكلي اشبـيك اكـله اولـيـدي اشبـكني

الله اولـحد امـن اشـبگ علي طوله
يفز صوت اعله راسي طاح الحگوله
واركض يـمه بـس هـوه عـدل يمي
يكلي المـن تگـول اولـيدي افزعوله

يوليدي اگله == كدامي امشي
تمشاله خطوه == وشيبلي رمشي == يطيح

كضاني خوفي == وحيرني وضعه
جم ليله هيه == وعطشان اسمعه == يصيح
===========================

يريتي ولا بقت تشتم
تعت بيه اعله فوك الهم
موش ابناگه اشوفن زينب اعله التل

بعدهه ولا شفت لخيام
ولا شفت اعله بر ايتام
من هسه اعله نوخ اهلي تهت مندل

لغاد وانضر ارقيه ابحضن زينب
تضحك بس اشوفنهه وعلي تنحب
اريد احضنهه بس اتلمس المنحر
الحمد لله واكولن بعده متسلب

ارقيه العزيزه == واولهه ناسي
ابتالي تعبهه== اتموت اعله راسي= يناس

وكلما كعدنه== بصفاحي اكضن
امشي اعله صفحه == وبالشوچ المن = يناس

===========================

ابجماله القاسم ومرني
شفت بي الحسن هدني
اعله حك الخوه فاكدلي اخوو يسوه

انا الحزني ترس كلبي
على العباس اجه دربي
شبكني وجفه شفته بضهري ماهوه


بده بكلبي يخوفني الهظم واصياح
الجنت بي تشد ضهرك بعد هالراح
فرع راسك ولا تبقه الاعمامه
ابن حضن اختك بلا جفوفه وطاح

اهنانه بعيوني == ماكمت اشوفن
ساعه اعله جفه == العباس اطوفن = دموع

عيني اعله عينه == وعينه اعله عيني
من يبتسملي === ايكطعلي اديني == وضلوع

===========================

وبده ابراسي يموت الحيل
اعله بالي وضلت اطر خيل
ركضهه ما يهمني اعله خيامي هل علتي

اعله كد ما انوجع عالكاع
الحسين اعله زينب ضاع
وتوصل بيه ما تعرفني حته اختي

اطيح انه وتگوم الناس عالخيمه
ويتيمه اعله الله تركض تعثر ايتيمه
من اسمع طلعن ابطولي اكوم الهن
وارد اوكع على جرحي وعلى ضيمه

ابكل حيلي اكومن === وافزع عليهن
بس يا هضيمه === بيا حال اجيهن == سهام

يا حيره هايه === الما منهه تالي
بالطف يراكض == يبقى دلالي  == حرام
===========================
سجاد ابراهيم الكعبي

تعب العمر

الهودج يشيل

عود جنت محسبه امشي    بضعنكم
وچلمه امشي ويانه  اتنطرها   منكم
باسمي ما صحتوني.... شعجب خليتوني
من اصبح المصباح   شو ماچني بتكم
__
شنهو ذنبي لمن  اربي كل خواتي اتحضرن بس اني ضليت
حالي يكتل دمعي يهمل من شفت ذيج الهوادج تارسه البيت
رحت يمهم وحسستهم  وبدعاء السفر  يمهم  لمن ادعيت
شو نسوني وما خذوني جم دعاء جم بسمله جم مره ناديت

شلون اسدن بابي   واني  مناطرتكم
وچلمه الكواهم  الله   محضره  الكم
دمع تجري عيوني..... شعجب خليتوني
من اصبح المصباح شو ماچني بتكم
____

يا اسم  الله  مودع  الله   وماريد ا عرضلك  بهاذه  سفركم
موعليله    ولا  نحيله   بويه اخذوني  ولو  خدامه  عدكم
امشي بسكوت ومالي صوت ما اريدن ناكه ممشه امشي بضعنكم
خادمه الكم  وافرشلكم وكلشي  تردونه   انفذه  بساع الكم

حجايه امشي  ويانه  ما سمعانه منكم
ياهلي   اخذوني  ولو  خدامه  عدكم
خادمه اخذوني ....  شعجب خليتوني
من اصبح المصباح شو ماچني بتكم
____

لون ادري شضام دهري جان بسكوت اضم روحي بل هوادچ
متانيه  الرد   چاني  وحد  ليش محد كالي لمي  الحوايچ
بهاي الضعون وين يردون وليش  خلوني بالم   وبحسره اعالچ
كلها راحت واستراحت والوحيده اني ضل دمعي  يناشچ

الرايح وي  الجاي  انشده  عن دربكم
وانعم    الله   لو رساله   جايه  منكم
دمعي دم بجفوني ........ شعجب خليتوني
من اصبح المصباح  شو  ماچني  بتكم

___
محضره لاكوار  مرتبه الدار  عمي  العباس  كال  يرد  اليه
مناطره احباب ولازمه الباب اليوم باجر لو يجني المغربيه
كليبي مچمور  جنه  تنور  مناطره  العباس  واحسبله بديه
موش كلهن  وحده منهن  هموم  وفراك وتعب  ملموم  بيه

بل سلامه  الكربلا  لو   طب  ضعنكم
يهلي  لا تنسوني    واني   مناطرتكم
ليش ماخذتوني ........ شعب خليتوني
من اصبح المصباح  شو  ماچني  بتكم

___

باب  بيتي  وبثنيتي   انطر    العباس   هلبت   لنه  چاني
راسي شيب ضهري حدب  من كثر ما بل درب اوكف وتاني
بكلبي جمره وبيه حسره ليش من  طف  كربلا محد لفاني
شو نسوني وما اجوني من ارد اعاتبهم احس يثكل الساني

والتهي بنوحي وابطل   من   عتبكم
واسمع  الشمات  كالو    ايسي   منهم
ليش ماتردوني .......... شعجب خليتوني
من اصبح المصباح  شو  ماچني  بتكم

الشاعر ضرغام منعم الكربلائي

حيرة العليلة

يالكتلي تعود شمتاني ..منك مرسال ماجاني
بالغربه وحيده ..شو ضلت حميده
*
يالكتلي السفر ايام  احس بعيونك شبيها
تنظرلي وتهل دموع  اريد افهم محاجيها
حسيت بسفرتك هاي  اصير يتيمه تاليها
يمسلم شابت بنيتك  هجرك طول اعليها

بدمعات العين مهضومه ..ومن سهر الليل ملجومه
كمت انخه الصميده  ..شو ضلت حميده
*
طلعت وي الضعن امشي  بعبرتي اتلفت بحيره
الوج بكسرة الخطار  ومن ديره نطب ديره
الك مشتاكه يابويه  ارحم گلب الزغيره
كل دمعه اعلى خدي تطيح تكلي راح ابو الغيره

يابويه شلون عايفني .. وما يهده الليل من وني
بديار البعيده  ..شو ضلت حميده
*
يابويه الهجر ذباح  وكت الليل يذبحني
ليش بجفه عمي حسين كام براسي يمسحني
وجلمات بلسان يكول يابن عمي سامحني
يلجمني الهوه لو مر  يبويه ودمعي يجرحني

مابين العين خلاني ..ولصدره حسين ضماني
وين ابوي اريده  ..شو ضلت حميده
*
يون كلبي وخذاني الهم يبويه وهاجت آلآمي
بالغربه وكلب مجروح  طفله وضاعت احلامي
يا حيره الخذت كلبي بالطف حيرت الضامي
يصيح شما ترض الخيل يزينب هالله بأيتامي

شمسويه الخيل بضلوعه .. ينهد الحيل لدموعه
ومن كطعو وريده  ..شو ضلت حميده
*
طلعت وي الحرم اركض  ونار الخيمه تجويني
ودخان الخيم ورماد كام يجلب بعيني
افر ويركض السلاب يبويه بسوطه ياذيني
وجم مره تجي زينب من عدهم تحاميني

طفله وبحبال شدوني .. ولدرب الشام ودوني
عكب الطاحت ايده  ..شو ضلت حميده
*
الابو يهل الرحم خيمه وندار الزمن بيه
طاحت خيمتي وضليت يتيمه بغربه مسبيه
اون بصدري الك شوغات المصايب جارت اعليه
يتامه انه ورقيه نروح وعرفت شبيها وشبيه

بالطف زغار والصعبه .. نتشابه حيل بالغربه
بدمعي الك قصيده  ..شو ضلت حميده
*
تمت
احمد الخفاجي

بالغربه وحيده

هلا راعي النوماس ..كله غيره واحساس
يله حيوا العباس ..والنعم
**
هلا يالشايل الرايه بيمينه .. هلا يالغرك السبعه بجبينه
يعرك مستحه لو شاف الحسين ..ودوم اعلى الخدر فايض حنينه
ابو الرايه .. يدك ثايه ..وابد مادنك الراس
ركب مهره ..وعلي بخزره ..كامت ترجف الناس

هذا حلو الاطباع ..تبده ماي اعلى الكاع
خضر الطف نعناع ..والنعم
*
حكها ام الخدر تتباها بأسمه.. حار وما برد بالحومه دمه
مثله اعلى الارض ماصاروا ثنين ..صار الها الهوه وزينب تشمه
رعب لو هب ..اخو زينب ..يكطع راح الانفاس
ابو الغيره ..تعابيره ..بس بروحه ينقاس

بزوده راعي الكلفات ..مايثني السطرات
هذا راعي الصعبات ..والنعم
***
هيبه اعلى الارض ماكو بصفاته ..راعي الزود ومدلل خواته
عمود البيت وفياي الصواوين ..كمر ياناس بالطف شحلاته
بضوه عيونه ..يسمونه ..صكار الحرايب
رفع سيفه ..واخذ حيفه ..رجفها الكتايب

غيمه صار الوفاي  .. تارس الخيمات فياي
للخيم جر راك الماي . ونعم
**
طب للمشرعه وخورس زلمها .. وكام ايطشر بكيفه ويلمها
فروا عالنهر مثل النساوين .. هنا خل الزلم تعرف حجمها
نهر بيده ..ضوه عضيده ..وشد اعلى المتن جود
شهم طبعه ..طوه السبعه ..وخط بجفه الحدود

خطط حدود الخيام ..غيره ماتعبر جدام
تنحني لطوله السهام ..والنعم
****
هلا يالعشكته نجوم الثريه ..اله كام النهر ياخذ تحيه
يامحلى القيافه البيها عباس ..محير اهل السمه واهل البريه
كمر ليله ..عالكحيله ..وبيمينه العلم شال
عله القاده ..ضوه الساده ..طب للحومه زلزال

يغلي دم وريده ..رحه صاروا بايده
يطحن بسيفه البيده .. والنعم
**
هلا يمكحل الغيمه بسماها ..هلا يالوجها شمس الله وضواها
ثلث تنعام كام يصيح الحسين ..من ام البنين ومن ضناها
رفع راسي ..هوى انفاسي..اخوي محزم حزام
ضوى الكمره ..غفه بصدره ..وعين الكمر متنام

حارس عله الصيوان ..يروي جفه العطشان
تهابه كل الفرسان ..ونعم
****
هله بالقائد بكل المراتب..هله يمعجب السبعه العجائب
مو بالجربه جاب لزينب الماي .. بجفوفه النهر للخيمه ساحب
  ابو النخوه .. والمروه .. هيبه القائد العام
شمس ضوه ..  الف فدوه ..لطوله تلوك الاوسام

براسه حلوه الريشات .. شبع الطف صفنات
بمتنه تغفه النجمات .. ونعم
***
تمت
احمد الخفاجي

هلا راعي النوماس

#قصيدة_لمحرم_الحرام


دارت سنة وتانينه.....ولمجلسك حنينه
تلكانه كل عام..........يحسين خدام
ـــــــــــــــ
مو سالفه دمعة وعين دنياي الك وآخرتي
يل خدمتك رفعة راس تقبل علي جائزتي
بالدنيا ملتهية الناس وانته الصرت سالفتي
جمرك حوافر يحسين وانقشت بذاكرتي
خدامك التمينه.......... ولمجلسك حنينه
نرفع لك اعلام..........يحسين خدام
ــــــــــــــ
ممنون الك يا مولاي  هاي السنة تخليني
لهاي المجالس يحسين تكض ايدي وتدليني
تاخذني دنيا والكاه نورك نبي ويهديني
وين انطي وجهي بلياك من غيرك يلفيني
ونة عشك ونينه..........ولمجلسك حنينه
شما دارت ايام..........يحسين خدام
ــــــــــــــ
هالنفس ما تصفى وياي ممشاها بالمكلوبي
كلشي اخسر وكله ايهون كونك تضل محبوبي
لمن ازورك مشتاك  ما تباوع اعلى اذنوبي
منك ارد صافي البال  متروسه خير جيوبي
خدام الك ضلينه..........ولمجلسك حنينه
عفناها الاوهام..........يحسين خدام
ــــــــــــــ
دليتني اعلى الطيبات  طبعي يصير انساني
خليتني احجي الزينات واحمل ظلم جيراني
ما اشيل غيض اعلى الناس وي اهلي مو عدواني
ما ادنك لباطل  راس واتواضع لخواني
باخلاقك تربينه..........ولمجلسك حنينه
باخلاق الاسلام..........يحسين خدام
ــــــــــــــــ
قرأن اشوفك مذبوح يقره النحر آياتك
كل آيه اسمعها تصيح يبن ادم اقضي الفاتك
فرصة العمر يا مسكين واتعلم امن اموتك
لا يغرك اسمك يفلان ما تنحسب عثراتك
بحمايتك نادينه..........ولمجلسك حنينه
وانعيش الآلام..........يحسين خدام
ــــــــــــــ
نعيم ابو باقر الساعدي

خدام يحسين

دعم مؤسسة منبريون الحسينية
#افضل قناة للنعي
https://www.tg-me.com/+P0VV4bLqtzuKdcQS
#للاشتراك بالدعم @ahmed_alziwar0

تحضيرات محرم 1446
لعمل هندسة صوتية عن طريق بصمة الواتساب
او التلجرام وانت كاعد بالبيت
تواصل معنى
@ahmed_alziwar0
واتساب
07732320742